The female team leading Banteay Kdei’s restoration 

via Koh Santepheap, 28 June 2020: Article in Khmer about the restoration of Banteay Kdei being led by a female team of archaeologists and architects.

ខេត្តសៀមរាប ៖ នា​ថ្ងៃ​ទី​២៧ ខែមិថុនា ឆ្នាំ​២០២០ នៅ​ខ្លោងទ្វារ​ខាងលិច​នៃ​ប្រាសាទបន្ទាយក្ដី កំពុង​ទទួល​បានការ​ជួសជុល​ដោយ​អ្នកជំនាញ​ជា​ស្ដ្រី ហើយ​មាន​សភាព​ដូច​ប្រាសាទ​ដទៃ​ទៀត​ដែរ ប្រាសាទបន្ទាយក្ដី​រង​ការ​ខូចខាត​ដួល​រលំ និង​ទីតាំង​ខ្លះ​មាន​សភាព​ទ្រុឌទ្រោម​ខ្លាំង​។ ថ្មី​ៗ​នេះ អាជ្ញាធរ​ជាតិ​អប្សរា​បាន​ចាប់ផ្តើម​ការ​ជួសជុល​ខ្លោងទ្វារ​ខាងលិច​ប្រាសាទ​ដោយ​ក្រុម​អ្នកជំនាញ​ជា​ស្ដ្រី​។

បុរាណ​វិទូ អ្នកស្រី នេ​ត ស៊ី​មន នៃ​នាយកដ្ឋាន​អភិរក្ស​ប្រាសាទ​ក្នុង​ឧទ្យាន​អង្គរ និង​បុរាណវិទ្យា​បង្ការ ដែល​កំពុង​បំពេញការងារ​នៅ​ការដ្ឋាន​ខ្លោងទ្វារ​ខាងលិច​ប្រាសាទបន្ទាយក្ដី​ឱ្យ​ដឹង​ថា ស្ថានភាព ជាក់ស្ដែង នៃ​ខ្លោងទ្វារ​នេះ​គឺ​ថ្ម​រំកិល​ចេញពី​ទីតាំង​ដើម រីឯ​ផ្នែក​ជញ្ជាំង​មាន​ភាព​រហែក​ពី​ខាងក្រោម ទៅ​លើ​។ អ្នកស្រី​ពន្យល់​ពី​ហានិភ័យ​នៅ​ការដ្ឋាន​នោះ​ទៀត​ថា សភាព​ថ្ម​នៅ​ផ្នែក​ខ្លះ​ស្ទើរ​របេះ​ធ្លាក់ ដែល​អាច​មាន​ហានិភ័យ​ខ្ពស់​ដល់​ទេសចរណ៍ និង​ទាមទារ​ឱ្យ​មានការ​ជួសជុល​ជា​បន្ទាន់​។

កញ្ញា ហាន សុច្ច​រី ស្ថាបត្យករ នៃ​គម្រោង​ជួសជុល​ខាងលើ​បាន​សិក្សា​លម្អិត​លើ​ស្ថានភាព​ថ្ម​ពុក​ផុយ​នៅ​ទី​នេះ​។ តាម​ការ​សិក្សា​របស់​ស្ថាបត្យករ​រូប​នេះ ការ​ដួល​រលំ​នៃ​ខ្លោងទ្វារ​នេះ​មាន​កត្តា​ច្រើន​ដូច​ជា អាយុកាល​នៃ​ថ្ម អាកាសធាតុ និង​ការ​បំផ្លាញ​ពី​ឫស​ឈើ​។ តាម​ការ​វាយតម្លៃ​ពី​អ្នកជំនាញ ខ្លោងទ្វារ​ខាងលិច​ប្រាសាទបន្ទាយក្ដី​ដែល​កំពុង​ស្ថិត​ក្នុង​គម្រោង​កំណាយ​ឆ្នាំ​ដំបូង មាន​ស្ថានភាព​ខូចខាត​ប្រហាក់ប្រហែល​៧០​ភាគរយ​។

Source: ការ​ជួសជុល​ប្រាសាទ​ខ្លោងទ្វារ​បន្ទាយក្ដី មាន​អ្នកជំនាញ​ជា​ស្ត្រី – Koh Santepheap Daily